បេឡាជាតិរបបសន្តិសុខសង្គមហៅកាត់ថា (បបស) គឺជាគ្រឹះស្ថានសាធារណៈរដ្ឋបាល មានបេសកកម្មបម្រើ ឱ្យវិស័យសន្តិសុខសង្គម ដែលបច្ចុប្បន្នកំពុងដាក់ឱ្យដំណើរការរបបធានារ៉ាប់រងហានិភ័យការងារ និងរបបសន្តិសុខសង្គមផ្នែកថែទាំសុខភាព សម្រាប់កម្មករ-កម្មការិនី។
លោក ជាវ ប៊ុនរិទ្ធិ បានបន្ថែមថា បច្ចុប្បន្ននេះរាជរដ្ឋាភិបាលបានប្រគល់ភារកិច្ចដល់បេឡាជាតិរបបសន្តិសុខសង្គម ដើម្បីរៀបចំរបបសន្តិសុខសង្គមសម្រាប់មន្រ្តីសាធារណៈ។
លោក ជាវ ប៊ុនរិទ្ធិ |
របបសន្តិសុខសង្គមសម្រាប់មន្រ្តីសាធារណៈនេះមានបីដូចកម្មករនិយោជិកក្នុងវិស័យឯកជនដែរ
ទី១ គឺគ្រោះថ្នាក់ការងារ
ទី២ ថែទាំសុខភាព
ទី៣ សោធននិវត្តន៍។
ដោយឡែកសម្រាប់សោធននិវត្តន៍ មន្រ្តីសាធារណៈបានទទួលហើយ។ ប៉ុន្តែរបបគ្រោះថ្នាក់ការងារ និងរបបថែទាំសុខភាពមន្ត្រីសាធារណៈទទួលបានដែរ តែមិនពេញលេញ។ មិនពេញលេញមានន័យថា នៅពេលដែលមន្រ្តីសាធារណៈគ្រោះថ្នាក់នៅនឹងកន្លែងធ្វើការ គ្រោះថ្នាក់នៅពេលបំពេញបេសកកម្មតាមខេត្ត និងមានជំងឺវិជ្ជាជីវៈ ពេលចូលទៅមន្ទីរពេទ្យត្រូវបង់លុយខ្លួនឯងសិន បន្ទាប់មកយកវិក្កយបត្រនោះ ដើម្បីសុំ ទូទាត់ថវិកាពីអង្គភាពវិញ។
មន្រ្តីសាធារណៈដែលនឹងទទួលបានពីរបបនេះ៖
ទី១, សំដៅលើមន្ត្រីរាជការ ដែលបាននឹងកំពុងបំពេញការងារនៅក្នុងក្រសួង និងស្ថាប័នរដ្ឋ ទាំងរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ
ទី២, គឺមន្ត្រីរាជការបម្រើការងារនៅអគ្គលេខាធិការដ្ឋានរដ្ឋសភា អគ្គលេខាធិការដ្ឋានព្រឹទ្ធសភា អគ្គលេខាធិការដ្ឋានក្រុមប្រឹក្សាធម្មនុញ្ញ ក៏ដូចជាមន្រ្តីជាប់កិច្ចសន្យា ហើយមន្រ្តីសាធារណៈនេះបូករួមទាំងមន្រ្តីនយោបាយ ដែលជាមន្រ្តីមានអាណត្តិ ឧទាហរណ៍ដូចជាមន្រ្តីក្រុមប្រឹក្សាឃុំ ក្រុមប្រឹក្សាស្រុក ខណ្ឌក្រុង ក្រុមប្រឹក្សារាជធានីខេត្ត ប្រធានភូមិ អនុភូមិ និងសមាជិកភូមិ ហើយបូករួមទាំងតំណាងរាស្ត្រផង បើសិនខាងរដ្ឋសភាបញ្ចូលមក។ មន្រ្តីនគរបាលជាតិ លើកលែងតែមន្រ្តីស្ថិតនៅក្នុងកងយោធពលខេមរភូមិន្ទមានន័យថា ក្របខ័ណ្ឌក្រសួងការពារជាតិ។ ដោយសារខាងក្របខ័ណ្ឌវិស័យការពារជាតិត្រូវបានកំណត់ដោយអនុក្រឹត្យដោយឡែក។
លោក ជាវ ប៊ុនរិទ្ធិ ឱ្យដឹងបន្ថែមថា ព្រះមហាក្សត្រនៃព្រះរាជាណាចក្រកម្ពុជា បានឡាយព្រះហស្តលេខាទៅលើព្រះរាជ្យក្រឹត្យស្ដីពីការបង្កើតរបបសន្តិសុខ សង្គម ផ្នែកហានិភ័យការងារ និងផ្នែកថែទាំសុខភាព សម្រាប់មន្រ្តីសាធារណៈ រួមទៅនឹងអតីតមន្រ្តីរាជការ និងអតីយុទ្ធជនរួចហើយ។
អតីតមន្ត្រីរាជការ សំដៅទៅលើមន្ត្រីចូលនិវត្តន៍ និងអតីតយុទ្ធជន។ បេឡាជាតិរបបសន្តិសុខសង្គមកំពុងប្រជុំក្រុមមន្រ្តីបច្ចេកទេសមកពីអន្តរក្រសួង បន្ទាប់មកដាក់ចូលក្នុងកិច្ចប្រជុំពេញអង្គគណៈរដ្ឋមន្ត្រី ដើម្បីធ្វើការអនុម័តនៅដើមខែ សីហា នេះ។
“អញ្ចឹងនៅពេលសម្ដេចលោកចុះហត្ថលេខាហើយ យើងនឹងរៀបចំដាក់ឱ្យដំណើរការនូវរបបហានិភ័យការងារ និងរបបថែទាំសុខភាពសម្រាប់មន្រ្តីសាធារណៈ នៅពេលដែលរបបទាំងពីរនេះដើរ បងប្អូនមន្ត្រីរាជការយើងគាត់អាចទៅទទួលសេវាថែទាំសុខភាពនៅមន្ទីរពេទ្យរដ្ឋដោយឥតគិតថ្លៃ ដែលការចំណាយ គឺជាបន្ទុករបស់បេឡាជាតិរបបសន្តិសុខសង្គម ហើយរដ្ឋជាអ្នកទទួលបន្ទុកចេញលុយហ្នឹង ការបង់វិភាគទាន គឺរដ្ឋ ក្រសួងសេដ្ឋកិច្ច និងហិរញ្ញវត្ថុជាអ្នកបង់លុយផ្នែកគ្រោះថ្នាក់ការងារ និងថែទាំសុខភាព”។ចំពោះអតីតមន្ត្រីរាជការ និងអតីតយុទ្ធជនក៏ដូចគ្នាដែរ គឺរដ្ឋជាអ្នកបង់ឱ្យ។ នេះគឺជាដំណឹងរីករាយមួយដែលគ្រប់គ្នាតែងទទូចចង់បាន ជាពិសេសអតីតមន្រ្តីរាជការ។
ថ្លែងក្នុងពិធីសម្ពោធ ដាក់ឲ្យប្រើប្រាស់ជាផ្លូវការ «ក្របខ័ណ្ឌគោលនយោបាយជាតិ គាំពារសង្គម ឆ្នាំ ២០១៦-២០២៥ » កាលពីថ្ងៃទី២៤ ខែកក្កដា ឆ្នាំ២០១៧ កន្លងមកនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក៏បានលើកឡើងជុំវិញបញ្ហាខាងលើផងដែរ។ បន្ថែមលើនេះសម្តេចបានស្នើសុំឱ្យខាងសេដ្ឋកិច្ចក្រៅប្រព័ន្ធចូលក្នុងក្របខណ្ឌគោល នយោបាយជាតិ ដើម្បីការធានារ៉ាប់រងផ្នែកសុខភាព និងគ្រោះថ្នាក់ផ្សេងៗ ពីបេឡាជាតិរបបសន្តិសុខសង្គម។
នេះជាក្របខ័ណ្ឌគោលនយោបាយជាតិគាំពារសង្គម ២០១៦-២០២៥ ជាផែនទីបង្ហាញផ្លូវរយៈពេលវែង ដើម្បីកសាងប្រព័ន្ធគាំពារសង្គមមួយ ដែលមានប្រសិទ្ធភាពបម្រើគោលនយោបាយកាត់បន្ថយភាពក្រីក្រ និងកាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន សំដៅលើកកម្ពស់សុខុមាលភាព។
សម្ដេចតេជោ ហ៊ុន សែន ក៏ស្នើឱ្យក្រុមប្រឹក្សាជាតិគាំពារសង្គមត្រូវធ្វើការងារនេះឱ្យបានល្អដើម្បីជំរុញឱ្យការអនុវត្តមានប្រសិទ្ធភាព ស្របតាមគោលដៅ ដែលបានដាក់ចេញនៅក្នុងឯកសារ ក្របខ័ណ្ឌគោលនយោបាយជាតិគាំពារសង្គម៕
Post a Comment